Članovi Doma za stare Grabovac, u Risnu, nakon 15 mjeseci ponovo mogu primati posjete i napuštati granice te ustanove, kazao je šef Socijalne službe Petar Pajković.
“Dakle, svaka osoba koja dođe mora imati negativan PCR test, ne stariji od 72 sata, mora imati dokaz da je u potpunosti završila vakcinaciju, da je od druge doze prošlo 14 dana, ili da se da na uvid test da je neko već prebolovao koronu, koji ne smije biti “mlađi” od 14 dana i stariji od 90 dana”, kazao je Pajković.
On je dodao da se posjete moraju zakazati i da su vremenski ograničene. Uz to, rekao je i da novi članovi ne moraju ići u izolaciju ukoliko su revakcinisani ili imaju negativan PCR test.
“Pozivamo starije građane da nam se slobodno jave. Ne možemo da zamijenimo primarnu kuću, ali možemo da budemo vaša druga kuća i da im priuštimo lijep boravak”, kazao je Pajković u svom gostovanju na jutarnjem programu.
